وتقول صاحبة المعجزة/
دى معجزه حقيقيه حصلت لاختى الصغيره من حوالى 3 سنين
كان بابا عاملنا مرجيحه فى باب الاوضه بتاعتنا بكرسى بلاستيك و متعلق بحبال
فكانت اختى بتتمرجح وواقفه عليها فاتقلبت من فوق الكرسى و نزلت على دماغها
ففضلت تصرخ و ماما جريت ودتها للدكتور فبص على راسها لقا مكان الخبطه بارز اوى و لقا اختى متوهه
و هى وقتها كان عندها حوالى 9 سنين فقال الدكتور ده تجمع دم و ممكن يكون جالها ارتجاج فى المخ فروحى اعملى اشعه و تعاليلى لان الموضوع خطير
فراحت ماما دهنتلها راسها بزيت البابا كيرلس اللى بيتوزع فى عيده فى الطاحونه
و اختى يوميها كانت متوهه و سخنه و مكان الخبطه مورم فى راسها
و تانى يوم راحت عملتلها الاشعه الفوريه و يوميها لقيناها اتحسنت شويه وفاقت
و تانى يوم ماما ودتها للدكتور و معاها الاشعه فاديتها له
ففضل يبص للاشعه و يقول اشعه مين دى و ماما تقوله بتاعت البنت فقالها يستحيل ازاى
قالتله بتاعتها بامانه فقلها امال الورم راح فين ده حتى لو بسيط ميروحش فى يوم و ليله
فقالها انتى عملتى ايه ؟
قالتله دهنتلها راسها بزيت البابا كيرلس
فقالها خلاص يبقا هو عمل الازم .......................
ليتمجد الله في قديسيه
+بركة وشفاعة البابا كيرلس تكون معانا امين+